Rom 6 | ATA | STEP | Ioxe, la sou nenge tavikala a loxovaa, ta'oxonu susu ulalaisio mo sou alauna noxou Lataua uxali tatila ne?

a 6:3Xal 3:27

b 6:4Kol 2:12

c 6:6Xal 5:24

d 6:112Ko 5:15; Xal 2:19

e 6:12Tav 4:7

f 6:13Rom 12:1

g 6:141Ioa 3:6

h 6:16Ioa 8:34; 2Pi 2:19

i 6:23Rom 5:12, 15

Romans 6

Adamu Muxalixu Soli Ia Kalisito Muxalixu Mauli

1 Ioxe, la sou nenge tavikala a loxovaa, ta'oxonu susu ulalaisio mo sou alauna noxou Lataua uxali tatila ne? 2 Mii vile aloxo ne uasisi manina! Nenge tesoisoli mukalu ne, mo teua'ulixu 'ilixo sou soli ne, ia loxovaa la sou nenge tatetelisou uxoxolu no anu maulinenge ulalai sio 'o? 3 ^aMo ngalavusou lexe nenge mukalusi ne te'ulo la texolu noxou Iesu Kalisito, mo no anu 'ilixo ane ne, la anu loxo nenge mukalusi te'ulo no nano no anu soli noxou ne. Ia ngingi ngalavusou uasi? 4 ^bLa sou no mine nenge te'ulo la aloxo nenge nenge'a Iesu tasoli mo mi'asinenge no lulu. Mo aloxo no anu xavi noxou Maminge xe mutulusou Kalisito no anu soli, la nenge kalumo tetulu ta'osasou Maminge no anu mauli alavua.

5 Lexe nenge nenge'a Kalisito tepita xe tesoli mukei, la nenge nenge'a takei tatulu aloxo anu mutulu ne. 6 ^cNenge telavusou lexe opo teinu noxinge ne a tevau musoli ne, mo telilixu ilou Kalisito teitexi no ovu valautu ne, la sou ukalusou xavi susu e uxolu uxaxai no anu vasimenge. Anu aloxo ne la sou susu umomomo sou usaxila'inge la uasi. 7 Xo itema ane musoli la anu muxolu va'axu no anu susu ne. 8 Vaimomo 'o, lexe nenge nenge'a Kalisito tesoli mukei, la nenge tamuxaxu tanenge lexe nenge nenge'a tano'u mauli ukei kalumo. 9 Xo nenge telavusou lexe Kalisito musoli mo mutulu ne, la umomomo sou usoli la uasi, mo soli xaviinu sou utaloxolixu la uasi. 10 Xo Anu musolisinge nenge latala ukalusi alaxu vilesisi la mutaloxolixu xavi susu ne. Ia vaimomo 'o Anu muxolu mumauli mo mu'itinu Lataua ualasou. 11 ^dNgingi kalumo ngaxavutalanu aloxo 'o, ngingi kalumo ne ngesoli mo susu xaviinu sou usaxila'inge la uasi. Ia ngexolu ngepita noxou Kalisito Iesu la ngemauli mo ngongi'a Lataua ngexolu. 12 ^eAloxo ne, la sou mamu sou susu uxolu usaxila'u vasimenge mo u'oxongengi la ngamulinu masaxa masua sou vasimenge ne. Xo vasimenge ne anu usoli ane. 13 ^fMo mamu sou nga'italonu mingemingengi no vasimenge no anu susu, loxo anu mii sou nga'oxo'oxonu 'ili'ilixo masumasua no anu. Ia anu laixe lexe nga'italonu maulingenge ukalusi ulai noxou Lataua aloxo ta mitema e misoli ia mitulu mimauli la. Mo ngalosou mingemingengi no vasimenge mo Lataua usaxila'u loxo anu mimii sou nga'oxonu 'ili'ilixo mulapu no anusi. 14 ^gAnu aloxo ne la susu usaxila'inge la uasi, xo ngingi vaimomo 'o ngaxolu no laaxu lapuloto la uasi, ngexolu no nano no anu alauna noxou Lataua.

Nenge ta Mitema sou Taxaxai no Anu 'Ilixo Mulapu

15 Nenge taxolu no laaxu lapuloto la uasi, la sou nenge tavikala a loxovaa? Male anu laixe sou nenge ta'oxonu susu xo nenge texolu no nano no anu alauna noxou Lataua? Mii vile aloxo ne uasisi manina! 16 ^hNgingi ngelavusou aloxo 'o, no mine nga'italonu maulingenge ulai noxou itema vile mo ngalolomuxu vaikalau, la ngingi ngaxali loxo ta mitema sou ngaxaxai no laaxu susu, la anu uno'inge ulai no anu soli xe ngaxaxai sou ngamulinu vaivaikala noxou Lataua laixe, la u'oxongengi ngaxali laixe mo Lataua umoxo'inge lexe ngingi ngamitema ngelapu. Ia ngingi ngalavusou aloxo ne uasi? 17 Ia nenge talemolu laixe musuku noxou Lataua xo ngingi tei la ngexolu ngexaxai no laaxu susu mo ngexali ta mitema sou xaixai noxou. Ia vaimomo 'o ngingi ngelomusou a'alo maninasou no anu vaikala noxou Lataua la ngemulinu maninasou no tangengi. 18 Ngingi susu musakisakingengi ia vaimomo 'o, Lataua mululusinge la ngexali ta mitema sou xaixai vitanisi sou 'ilixo mulapu.

19 Eni evivikala ne, loxo nenge ta mitema tavivikala, mo sou ulamana noxinge. Xo tei no mine ngingi ngalamana uasi, la nge'italonu mingemingengi no vasimenge no anu susu, la nga'oxonu 'ilixo laixe uasi mo nge'oxonu 'ili'ilixo masumasua iouiou se'i no anu. Ia vaimomo 'o ngingi ngelamana la u'oxongengi ngaxali ta mitema malemalenga. 20 No mine ngingi ngexolu ngexaxai no laaxu susu, la ngaxolu no laaxu 'ilixo laixe mo ngamulinu uasi. 21 Ia ngingi ngeno'u mii ma'ia laixe no anu 'ili'ilixomengi tei e vaimomo 'o ngingi ngamaela no anu 'o? 'Ili'ilixo ne lakolisou ane soli nesi! 22 Ia vaimomo 'o Lataua mululusinge no anu sakisaki sou susu mo mu'oxongengi ngexali ta mitema sou ngaxaxai vitanisi noxou. La sou ulosinge lakolisou ane u'oxongengi ngaxali malemalenga mo ngano'u mauli laixe utotomu mo kaluxu uasi. 23 ⁱAloxo ne la sou ta mitema ane ixaxai no laaxu susu ne ino'u lakolisou ane soli nesi. Ia mauli kaluxu uasi teno'u ne Lataua mulosinge vitanisi no anu xaixai noxou Tila noxinge Iesu Kalisito.